UNWANTED VISITOR
Why when you want relax
An’ jus’ chill out
You neighbour come 'roun'
An’ wan’ run she mouth.
You open de door
An’ before you say ‘come in’
She inside you house
Wid you bottle ah Gin.
She tek out she Embassy
An’ you heart start fu grieve
‘Cause once she start smoke
It mean she nah leave!
She start pan de Gin
An’ bwoy she drink plenty
But whenever she visit
She two han’ dem empty.
Now she start drink
She ready fi chat
An’ it’s only now she a tek off
She coat an’ she hat.
Victim number one
Pan she gossip agenda
Is she best friend, an she enemy
A girl they call Brenda.
She chat ‘bout Brenda
She say Brenda chat ‘bout she
An’ when de two a dem togedda
Me know dem chat ‘bout me.
She say she want to sue de council
She twis’ she ankle, the other day
An’ it was pan dem prapatee
So dem mus’ pay.
Now she’s a strong woman
But I really don’t tink
Dat she had any business;
a wash she foot
In a public toilet sink!
She a sip sip she drink
Now she hungry an’ want eat
She cuss me say me can’t cook
Cause me no eat meat.
After she eat
She use de phone
She start tek out she plait
An’ beg me a comb.
She half-finish she hair
an’ say she a go
She put on she coat
an she hat.
She si’ dong,
drain she glass…
An’ still she a chat!
Me put on de T.V
Fu try drown she out
But not even concord
Is louder dan she big mouth!
At last she ready fu leave
Me walk she to de door
She borrow ten pound
An’ chat five minute more.
De only reason she leave
Is ‘cause de bottle a Gin don
Lord have mercy
If she did ever spot de rum!